កម្ពុជា រំពឹងថា ឆ្នាំ២០២០ នឹងទទួលបានភ្ញៀវទេសចរបរទេស ប្រមាណ៧លាននាក់

220

35784750_1743433479038475_1530616440376262656_nក្នុងពិធី បិទសន្និសីទអន្តរជាតិស្តីពីការអនុវត្តកិច្ចព្រមព្រៀង ទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន(ASEAN MRA-TP) នៅសណ្ឋាគារ សុខាភ្នំពេញកាលពីថ្ងៃព្រហស្បតិ៍៩កើត ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែមិថុនា ឆ្នាំ២០១៨ សម្តេចតេជោ ហ៊ុន សែន បានមានប្រសាសន៍ថា ក្នុងឆ្នាំ ២០១៧ ពិភពលោកទាំងមូលបានទទួលស្វាគមន៍ទេសចរអន្តរជាតិ ១៣០០លាននាក់ក្នុងអត្រាកំណើន៧%។ គេរំពឹងថាចំនួនភ្ញៀវទេសចរណ៍ពិភពលោកនឹងកើនឡើងដល់ ១,៤ពាន់លាននាក់នៅត្រឹមឆ្នាំ ២០២០ និង ១,៨ពាន់លាននាក់នៅឆ្នាំ ២០៣០ ។ សម្តេចបន្តថា នៅក្នុងតំបន់អាស៊ានទាំងមូលនៅឆ្នាំ២០១៧គឺទទួលបានភ្ញៀវទេសចរណ៍អន្តរជាតិ ១២៥ លាននាក់ គឺកើនឡើង ៨,៤% ជាចំនួនដែលបានព្យាករណ៍ទុក។

សម្តេចតេជោ បញ្ជាក់ទៀតថា សម្រាប់វិស័យទេសចរណ៍កម្ពុជាក៏មានការរីកចម្រើនផងដែរនៅឆ្នាំ ២០១៧គឺយើងទទួល ៥,៦ លាននាក់ក្នុងអត្រា១១,៨% ហើយនៅឆ្នាំ២០២០ប្រទេសកម្ពុជារំពឹងថា នឹងទទួលបានភ្ញៀវទេសចរណ៍អន្តរជាតិប្រមាណ ៧លាននាក់, ហើយនៅឆ្នាំ២០២៥ នឹងទទួលបានភ្ញៀវទេសចរណ៍អន្តរជាតិប្រមាណ ១០លាននាក់ និងនៅឆ្នាំ២០៣០ នឹងទទួលបានភ្ញៀវទេសចរណ៍ប្រមាណ១៥លាននាក់ផងដែរ។

សម្តេចហ៊ុន សែន អះអាងថា សមិទ្ធផលទាំងអស់នេះបានមកពីគោលនយោបាយឈ្នះ – ឈ្នះដែលបានជួយឱ្យប្រទេសកម្ពុជាទទួលបានសន្តិភាពពេញលេញ ជាមួយនឹងការបង្រួបបង្រួមជាតិ ឯកភាពជាតិនិងទឹកដី និងសន្តិសុខពេញផ្ទៃប្រទេស ហើយបច្ចុប្បន្នប្រជាពលរដ្ឋកម្ពុជាអាចធ្វើដំណើរ ដោយសេរីនៅគ្រប់ទីកន្លែងដោយគ្មានការភិតភ័យ ហេដ្ឋារចនាសម្ព័ន្ធត្រូវបានផ្សារភ្ជាប់គ្នាហើយភាពក្រីក្ររបស់ប្រជាពលរដ្ឋត្រូវបានកាត់បន្ថយយ៉ាងខ្លាំង។ ជាមួយនឹងភាពរីកចម្រើនគួរឱ្យកត់សម្គាល់ក្នុងការអភិវឌ្ឍន៍សេដ្ឋកិច្ចប្រទេសកម្ពុជាបានចូលរួមយ៉ាងសកម្មនៅក្នុងអង្គការក្នុងតំបន់ និងអន្តរជាតិដើម្បីលើកកម្ពស់ការអភិវឌ្ឍពិភពលោកសន្តិសុខនិងភាពរុងរឿង។

សម្តេចតេជោ ហ៊ុន សែន នាយករដ្ឋមន្ត្រី ក៏បានផ្តល់អនុសាសន៍មួយចំនួនដូចជា៖

១)ត្រូវយកចិត្តទុកដាក់ចំពោះនិន្នាការវិទ្យាសាស្រ្ត និងបច្ចកវិទ្យានាពេលបច្ចុប្បន្នជាពិសេសការបដិវត្ដន៍ឧស្សាហកម្ម ៤.០ និងការអភិវឌ្ឍន៍ចំនុចសិប្បកម្ម សិប្បនិម្មិត កន្លែងស្នាក់នៅ, និងការដឹកជញ្ជូន។ ក្នុងន័យនេះយើងគួរតែធ្វើឱ្យបានច្រើនដើម្បីចែករំលែកបទពិសោធន៍និងរឿងរ៉ាវជោគជ័យដើម្បីរៀបចំធនធានមនុស្សឱ្យបានល្អប្រសើរ។

២)ការអនុវត្តកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ានគឺជាយន្តការមួយសម្រាប់កែលម្អប្រព័ន្ធបណ្តុះបណ្តាលជំនាញទេសចរណ៍ដែលរួមចំណែកដល់ការកាត់បន្ថយចំណេះដឹង និងភាពខុសគ្នារវាងអ្នកជំនាញទេសចរណ៍នៅក្នុងតំបន់ដោយជួយសម្រួលដល់ការចែករំលែកបទពិសោធន៍ក្នុងការអភិវឌ្ឍជំនាញនៅក្នុងប្រទេសជាសមាជិក។ សម្តេចតេជោនាយករដ្ឋមន្ត្រី បានអំពាវនាវដល់ធនាគារឯកទេសឯកជនទាំងអស់ត្រូវមានកម្មវិធីផ្តល់ប្រាក់កម្ចីទាបសម្រាប់អ្នកវិនិយោគលើវិស័យទេសចរណ៍ពិសេសផ្តល់ប្រាក់កម្ចីដល់និស្សិតសម្រាប់ប្រើប្រាស់ក្នុងការសិក្សាផងដែរ។

៣)ជំរុញបន្ថែមទៀតដើម្បីបង្កើតយន្តការមួយសម្រាប់ការទទួលស្គាល់គ្នាទៅវិញទៅមកនូវបទពិសោធផ្អែកលើគុណភាព និងក្របខ័ណ្ឌច្បាប់នៃប្រទេសនិមួយៗ។ ទន្ទឹមនឹងនេះដែរសម្តេចតេជោសូមស្នើឱ្យថ្នាក់ដឹកនាំទេសចរណ៍អាស៊ានពិចារណាលើការបន្ថែមជំនាញទេសចរណ៍បន្ថែមទៀតទៅឱ្យកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន ខណៈដែលបច្ចុប្បន្ន នេះមានជំនាញត្រឹមតែ៣២ប៉ុណ្ណោះ។

៤)វិស័យទេសចរណ៍ត្រូវបានចាត់ទុកជាសកលថាជាវិស័យមួយដែលមានការចូលរួមចំណែកដោយផ្ទាល់និងដោយប្រយោលដល់ការសម្រេចបាននូវគោលដៅអភិវឌ្ឍន៍ចីរភាពរបស់អង្គការសហប្រជាជាតិឆ្នាំ២០៣០។

សម្តេចតេជោនាយករដ្ឋមន្ត្រី ក៏បានអំពាវនាវដល់គ្រប់ដៃគូអភិវឌ្ឍន៍អង្គការជាតិ និងអន្តរជាតិទាំងអស់ចូលរួម ដើម្បីគាំទ្រដល់បណ្តាប្រទេសជាសមាជិកអាស៊ានក្នុងគោលបំណងសម្រេចគោលដៅទាំងនោះ។

សម្តេតេជោ ហ៊ុន សែន បានវាយតម្លៃខ្ពស់ចំពោះលទ្ធផលនៃសន្និសីទអន្តរជាតិលើកទី២ នេះ ដែលបានផ្តល់ប្រយោជន៍ដល់ការអភិវឌ្ឍរួមគ្នានៃអ្នកជំនាញទេសចរណ៍របស់អាស៊ាន ដើម្បីលើកកម្ពស់ការងារ និងអ្នកជំនាញនៅក្នុងតំបន់ការអភិវឌ្ឍន៍ទេសចរណ៍ប្រកបដោយនិរន្តរភាពនិងទប់ស្កាត់រាល់ផលវិបាកអវិជ្ជមានដើម្បីធានាសន្តិភាព ស្ថិរភាពការអភិវឌ្ឍ និងវិបុលភាពនៅក្នុងអាស៊ាន ។

 

ចែករំលែក

មតិយោបល់